అమ్మ నేల

దేశ మాత  సిగలో
అనగనగా ఓ ముత్యం
అన్న పూర్ణగా సుప్రసిద్ధం

చిరునవ్వుల సిరిమువ్వలు
విరిజల్లులై రాలిన స్వర్గం
గోదావరి కృష్ణమ్మ
పెన్నమ్మ వంశ ధారలు
పారాడే పవిత్ర స్థలం
తెలంగాణ రాయలసీమ
కోస్తా ఉత్తరాంధ్ర
అంగాలై అలరారిన పవిత్ర దేహం
నన్నయాది కవులకు
పోరాట వీరులకు
సంఘసంస్కర్తలకు
స్వాతంత్ర్య యోధులకు
సంస్కృతీ సౌరభాలకు
నిలయమైన దేవాలయం
పేరు ఆంధ్ర ప్రదేశ్ రాష్ట్రం
తీరు దేశానికే ఆదర్శం

ఏ వేర్పాటు  దెయ్యం పూనిందో
ఏ  విభజన  అమావాస్య కమ్మిందో
ఏ రాజకీయ  రక్కసి  కాటేసిందో
ఏ  ద్రోహానికిబలి అయ్యిందో
అమ్మనేల వీడిపోతోంది
ముక్కలు చెక్కలైపోతోంది
తెలుగు నేలంతా
కన్నీళ్ళు కాలువలు కడుతున్నాయి
ఆవేదన అవధులు దాటుతోంది
సగటు తెలుగు గుండె మండుతోంది
అ  నుంచి అం  అః
క నుంచి బండీరా
అక్షరాల సాక్షిగా
కోట్లాది గుండెలన్ని
ఒక్కటంటు నమ్మిన హృదయం
వేరుపాటుపేల్చిన పేలుడికి
ఉలికులికి పడుతోంది
అన్నం సహించడం మానేసింది
ఆకలి నిద్ర దూరమయ్యింది

ఎవరు రాస్తున్నారీ తెలుగు వాడి తలరాత
ఎవరు చేస్తున్నారీ విధ్వంసపు కోత
ఎవరు చేసిన పాపం ఇది
ఏ విధాత విసిరిన శాపం ఇది
ఎందుకు నా కన్నతల్లికి ఈ కష్టం
ఎందుకు నా జన్మభూమికి ఈ నష్టం
సమాధానాలు లేని ప్రశ్నలే ఇవి
జవాబులు రావాల్సింది నేతల గుండెల్లోంచే
రుజువులు తేలాల్సింది చేదు నిజాల చీకట్లలోంచే